Islami tareekh ka jab sabse ahem aur dil ko dehlane wala aur ruh ko chhu lene wala panna jab khulta hai, to hamare saamne Battle of Karbala ka manzar yaad aa jata hai. Yeh koi aam zameen ya Daulat jhagda ya takht ki jung nahi thi, balki yeh haq (truth) aur batil (falsehood) ke beech ek aisi ladai thi jahan ek taraf rassi se bandhi majboori thi aur doosri taraf sabr ka imtihan. Agar aapne isse pehle hamara pichla post Karbala Ki Kahani Part 1 padha hai, to aap jaante honge ki kaise Hazrat Imam Hussain (R.A) ka qafila Iraq ke iss tapte hue sehra (desert) Karbala tak pahuncha tha. Aaiye ab isse aage ki dastan ko poori sachayi aur tareekhi ke hawalon ke sath samajhte hain.
7 Se 9 Muharram: Pyaas Ka Imtihan Aur Aakhiri Raat
Maidan-e-Karbala mein, 2 Muharram ko aane ke baad halaat lagatar kharab hote gaye. Yazid kaun tha : Yazid bin Muawiya ke dwara bheje gaye governor Ibn Ziyad ke hukm par 7 Muharram ko Imam Hussain aur unke masoom bacchon par paani band kar diya gaya. Furat nadi paas hi thi, lekin us par pehra laga diya gaya.
Jab suraj apne apni chamakti hui Roshni ke sath guroob ho jaata hai. Usi roj 9 Muharram ki shaam ko dushman ki fauj ne hamle ki tayyari shuru ki, Lekin Imam Hussain (R.A) ne ek raat ki mohlat mangi taaki woh Apne Rab ki ibadat kar sakein. Us aakhiri raat, jise ‘Shab-e-Ashura’ kaha jata hai, Imam Hossain ne apne saare sathiyon ko jama kiya aur waha per sabhi chirag bujha kar farmaya:
“Aei Sathiyon, Main tum sabko apni baiaat se azad karta hoon. Yeh dushman sirf meri jaan ka pyaasa hai. Tum raat ke andhere ka faida utha kar yahan se nikal jao.“
Lekin Pyare Nabi Muhammad SAW ke un wafadaar sathiyon ne rokar kaha ki hum aap par apni jaanein qurban kar denge par aapko chhod kar jinda wapis nahi jayenge. Yeh woh jazba tha jo is ladai ko duniya ki sabse anokhi jung banata hai. Jisko bass padh kar ya sun kr ki aankho se aansu aane lagte hai.
Yaum-e-Ashura: 10th Muharram Ki Subah
Jab phir se Aaftab ki roshni aasman ko cheerte hua duniya me faili , To phir Aakhir kaar woh din aa gaya jise tareekh ka sabse ghamgeen din mana jata hai. Agar aapne hamara post Ashura kya hai padha hai, to aapko iss din ki ahmiyat maloom hogi. 10 Muharram ki subah, Imam Hussain (R.A) ke paas sirf 72 saathi the, jabki dushman ki fauj mein hazaron ki tadaar soldiers shamil the.
Jung shuru hoti hai, aur ek-ek karke Imam Hussain ke saathi maidan mein gaye aur bahaaduri se ladte hue shaheed ho gaye. Inme Hazrat Hur (R.A) bhi the, jo pehle dushman ki fauj mein the par haq ko pehchan kar Imam Hussain ke sath aa mile the.
Shuhada-e-Karbala Ki Qurbaniyan
Battle of Karbala mein har ek Shuhadao ki shahadat dil ko rula dene wali hai. Hazrat Abbas (R.A), jo Imam Hussain ke bhai aur is qafiley ke Alamdar (flag-bearer) the, jab wo kheme me maujood masoom bacchon ke liye paani lene Furat nadi par gaye, to dushmanon ne unke dono baazu shaheed (Allah hu Akbar) kar diye aur unhe paani ka ek katra bhi na laane diya.
Isi tarah, Hazrat Ali Akbar (R.A) aur Hazrat Ali Asghar (R.A) ki qurbani ko duniya kabhi nahi bhool sakti. Hazrat Ali Asghar jo sirf 6 mahine ke masoom bacche the. Jab Imam Hussain unhe hatho par utha kar dushman ke samne le gaye ki is masoom ko 2 boond paani ki de do, Taaki iss masoom bache ka Halak geela ho jaaye, to paani ke badle Hurmula naam ke teerandaz ne unke gale par teer maar kar unhe shaheed kar diya. Aap sabhi Imagine kar sakte ho kya manzar raha hoga.
Rasoolullah ﷺ ne is khandaan ki ahmiyat ke baare mein pehle hi farmaya tha, jiska zikr humne Imam Hussain ki biography mein bhi kiya hai:
“Hasan aur Hussain jannat ke jawanon ke sardar hain.” — (Sunan At-Tirmidhi, Hadees: 3768)
Imam Hussain (R.A) Ki Aakhiri Jung Aur Shahadat
Jab ek-ek kar ke sabhi Sathi Shaheed ho gye to , Aakhir mein Imam Hussain (RA) bilkul akele reh gaye. Tab unhone Karbala ke maidan mein khade hokar ek aakhiri khutbah (speech) diya aur dushmanon ko samjhaya ki woh galat raste par hain. Lekin dushman par taqat aur lalach ka parda pada tha.
Imam Hussain ne akele hi hazaron ki fauj ka mukabla kiya. Unke jism par darjanon zakhm lage the. Jab Asar ki namaz ka waqt aaya, to unhone zameen par sajda kiya. Isi sajde ki halat mein Shimr naam ke zalim ne unka sir e mubarak jism se alag kar diya.
Quran-e-Paak mein Allah farmata hai:
“Aur jo log Allah ki raah mein maare jayein, unhe murda na kaho, balki woh zinda hain lekin tumhein iska ehsaas nahi.” — (Surah Al-Baqarah, Ayat 154)
Imam Hussain ne apna sir kata diya, lekin baatil ke samne sir na jhukaya. Unki is qurbani ne Islam ko hamesha ke liye zinda kar diya.
FAQs
Q1: Battle of Karbala kab aur kahan hui thi?
Ans: Battle of Karbala 10 Muharram 61 Hijri (10 October 680 AD) ko Iraq ke Karbala naam ke desert (registan) me Furat nadi ke kinare hui thi.
Q2: Karbala ki jung mein Imam Hussain ke sath kitne log the?
Ans: Imam Hussain (R.A) ke sath kul 72 saathi the, jisme unka parivar, chote bacche aur unke kuch wafadaar dost shamil the. Doosri taraf dushmanon ki fauj hazaron mein thi.
Q3: Hazrat Ali Asghar kaun the aur unhe kaise shaheed kiya gaya?
Ans: Hazrat Ali Asghar (R.A) Imam Hussain ke sabse chote 6 mahine ke bete the. Unhe Karbala mein pyaas ki halat mein dushman ke ek teerandaz (Hurmula) ne gale par teer maar kar shaheed kiya tha.
Q4: Hazrat Abbas (R.A) ko Ghazi kyun kaha jata hai?
Ans: Hazrat Abbas (R.A) Karbala ke qafila ke Alamdar (fauj ka jhanda uthane wale) the. Unki bahaaduri aur bacchon ke liye paani laane ki koshish ki wajah se unhe ‘Ghazi’ aur ‘Saqqa’ (paani pilane wala) kaha jata hai.
Q5: Imam Hussain (R.A) ko kisne shaheed kiya tha?
Ans: Karbala ke maidan mein Shimr bin Dhil-Jawshan naam ke zalim ne sajde ki halat mein Hazrat Imam Hussain (R.A) ka sar mubarak kaat kar unhe shaheed kiya chirag-e-mustafa ko bujhane ki koshish ki thi.
Conclusion: Jung Ka Asal Natija
Agarche dushmanon ko laga ki unhone Battle of Karbala jeet li hai, lekin haqeeqat mein jeet Imam Hussain ki hui. Yazid ka naam aaj ek gaali ban chuka hai, jabki Imam Hussain ka naam puri duniya me izzat-o-ehtraam aur mohabbat ke sath liya jata hai. Meri Aap sabhi Hazraat se request hai ki, Agar sabhi ko Imam Hussain ke naqsh e kadam per chalna hai to Hamesha haq ,sach aur sabar ke sath de, Jisse humari duniya aur aakhirat dono sudhar jaayenge, Allah hum sabhi ko Neq raha aur Apni ibadat karne wala baanaye- Aameen
(Note: Is dardnaak shahadat ke baad Ahle Bait ke masoom qaidiyon ke sath kya hua aur Yazid ka kya anjaam hua, yeh janne ke liye is series ka aakhiri part Karbala Ke Baad Kya Hua Part 3 zaroor padhein.
