Arbaeen Kya Hai? Yeh sawal muharram aur safar ke mahine me laakho log google per search karte hai. kyu ki sabhi jaanna chahte ki Imam Hussain RA ki shahadat ke 40 din baad kya hua tha. Jiski yaad me aaj bhi puri duniya Imam Hussain RA ko yaad karti hai.
Arbaeen 2026 ek koi tareekhi din nahi hai Balki yeh Karbala ke paigham ko zinda rakhne kaa naam hai. Imam Hussain RA ne Karbala me haq , sach , sabar aur insaaf aur deen e islam ki hifazat ke liye khud Shaheed ho gaye. Unki shahadat ke 40 din baad jo waqiyat pesh aaye , unhone tareekh ka rukh hi badal diya.
Nawasa-e-Rasool Hazrat Imam Hussain (RA) aur unke 72 jaan-nisaron ki shahadat ke theek 40 din baad manaye jaane wale is din ka talluq sirf rone ya gham manane se nahi, balki zulm ke khilaf us azeem ladaai ki yaad ko zinda rakhne se hai jise tareekh “Karbala ki kahani” ke naam se jaanti hai. Har saal muharram ke baad Safar ke mahine me 20 tareekh ko duniya bhar se karodon log Iraq ke sheher Karbala ki sir- zameen per pahunchte hain.
Lekin sawal yeh uthta hai ki shahadat ke 40 din baad aakhir aisa kya hua tha jiske chalte yeh din ek azeem historical movement ban gaya? Isko samajhne ke liye hume Muharram ki un surkh tareekhon aur Yazid ke us daur-e-hukoomat ko dekhna hoga jahan se is poori dastan ki shuruaat hui thi.
Karbala Ki Kahani Part 1: Muharram Aur Ashura Ka Pas-Manzar
Karbala ki dastan ko poori tarah samajhne ke liye aapko Karbala ki kahani part 1 par nazar daalni hogi , jahan humne isko bahut ache se samjhaya hai. jo 61 Hijri (680 AD) ki shuruaat se judee hai. Jab sawal aata hai ki Muharram kab hai ya iski shuruaat kaise hui, toh yeh Sirf ek naye Islamic saal ka aagaz nahi hai, balki yeh us 6th Hijri ka wo daur tha jab Islam ko bachane ke liye ek bohot badi qurbani di jaane wali thi.
Jaise hi Hazrat Muawiyah ka inteqal hua uske foran baad, unke bete Yazid ne khud ko musalmanon ka khalifa ghoshit kar diya. Yazid kaun tha? Yazid ek aisa shakhs tha jiska kirdar, islam ke bilkul khilaf tha. Woh chahta tha ki Hazrat Imam Hussain (RA) uski hukoomat aur uske galat kirdar par apni mohar lagayein yaani uski ‘Bayat’ karein. Imam Hussain (RA) ne baiyt ko thukra diya aur farmaya ki mujh jaisa insaan , Yazid jaise bad-kirdar ki bayat hargiz nahi kar sakta.
Isi inkar ke baad Imam Hussain (RA) ko Madina chhodna pada aur aakhirkar 2 Muharram ko wo apne Khandan aur sathiyon ke sath Iraq ke tapte hue registan ‘Karbala’ me gher liye gaye. 7 Muharram ko unka pani band kar diya gaya aur 10 Muharram yaani Ashura ke din maidan-e-Karbala me wo dardnak waqia hua jaha’n Imam Hussain RA aur unke masoom bacchon aur wafadar sathiyon ke sath nihayat tarike se shaheed kar diya gaya. Yeh Imam Hussain story ka wo pehla hissa hai jo insaniyat ko jhinjhod kar rakh deta hai.
Arbaeen Kya Hai? Shahadat Ke 40 Din Baad Kya Hua Tha?
Arbaeen ek Arabic lafz hai jiska matlab hota hai “Chalis” (40). Kisi bhi marne wale ke inteqal ke 40 din baad jo taziya ya fatiha hoti hai, use urfi zaban me ‘Chehlum’ kaha jaata hai.
10 Muharram ko shahadat ke baad, Yazid ki fauj ne Ahle Bait ki khwateen aur bacchon, jinme Hazrat Imam Zain-ul-Abideen (RA) aur Hazrat Bibi Zainab (RA) shamil the, un sabhi ko qaidi bana liya aur unhe pehle Kufa aur phir Damascus (Sham) ke darbar me laaya gaya. Sadiyon purani riwayat ke mutabik, jab in paak hastiyon ko qaid se rihaai mili, toh wo sabhi Madina jaate waqt Karbala ke maidan me theek 20 Safar ko pahunchein yani Hazrat imam Hussain aur tamam shuhadao ke Shaheed hone ke baad yeh 40va din tha, isliye isko Arbaeen or chehlum kaha jaata hai.
Pehla Arbaeen Aur Sahabi-e-Rasool Ka Pahunchna
Theek usi din, Allah ke Rasool (SAW) ke ek azeem sahabi Hazrat Jabir bin Abdullah Al-Ansari (RA) bhi Imam Hussain (RA) ki qabr-e-mubarak ki ziyarat ke liye Madina se Karbala pahunche the. Wo pehle sahabi the jinhone sabse pehle Imam ki qabr par gham-e-hussain me hazri di thi. Jab ek taraf se Sahabi-e-Rasool aur doosri taraf se qaid se riha hokar aaya Ahle-Bait ka karvan Karbala me mila, toh wahan ek kohram sa paida ho gaya. Yeh tareekh ka pehla Arbaeen tha, jahan se shahadat-e-khuzma ke 40 din baad gham ko ek nayi taqat mili aur duniya ne jana ki jeet talwar ki nahi, balki khoon-e-hussain ki hui thi.
Quran Aur Hadees Ka Hawala
Islam me shuhada aur khaaskar Ahle Bait ki mohabbat ko lekar bahot wazeh hidayat hain. Quran-e-Kareem me Surah Ash-Shura (Ayat 23) me Allah Ta’ala farmata hai:
“Aap farma dijiye ki main is (tableeg-e-din) par tumse koi ujrat (badla) nahi mangta siwaye iske ki mere Ahle Bait se mohabbat karo.”
Isi tarah, Allah ke Pyare Rasool Hazrat Muhammad (SAW) ne Imam Hussain (RA) ki ahmiyat ko lekar bahut jagah irshad farmaya hai. Sahih Bukhari aur Tirmidhi ki ek mashhoor Hadees hai jahan Aap (SAW) ne farmaya:
“Hussain mujh se hai aur main Hussain se hoon, Allah us shakhs se mohabbat farmata hai jo Hussain se mohabbat karta hai.” (Sunan At-Tirmidhi, Hadees: 3775)
Isliye hi Arbaeen ka yeh din isi Qurani hukm aur Hadees-e-Nabwi par amal karne ka ek zariya hai, jahan poori duniya ke musalman un paak hastiyon se apni aqeedat ka izhar karte hain jinhone deen ki khatir apna sab kuch qurban kar diya.
Arbaeen Walk (Mashay): Duniya Ka Sabse Bada Safeer
Aaj ke daur me Arbaeen ki pehchan “Arbaeen Walk” (Mashay) se hai. Najaf (Hazrat Ali RA ka roza) se lekar Karbala (Imam Hussain RA ka roza) tak lagbhag 80 kilometer ka rasta hai, jise log paidal chal kar poora karte hain.
Bina Kisi VVIP Vajah Ke Sailab: Is paidal yatra me bache, budhe, khwateen aur har mazhab-o-millat ke log shamil hote hain.
Mehman-Nawazi Ka Anokha Manzar: Pure 80 KM ke raste me Iraq ke rehne wale local log paidal chalne walon ke liye muft khana, dawa, rehne ki jagah aur yahan tak ki pair dhabane tak ki sewa muft karte hain. Wo isey Imam Hussain (RA) ke mehmaan ki khidmat samajhte hain.
Arbaeen Ki Ahmiyat Kya Hai?
Arbaeen ki ahmiyat sirf gham manane tak mehdood nahi hai.
Yeh din Musalmanon ko yaad dilata hai ki:
- Haq ke liye qurbani deni pad sakti hai.
- Zulm ke saamne khamosh rehna munasib nahi.
- Deen ki hifazat ke liye sabr aur istiqamat zaroori hai.
- Allah ke raste mein di gayi qurbani kabhi zaya nahi hoti.
- Imam Hussain (RA) ka paigham aaj bhi insaf, sachchai aur imaan ki misaal hai
FAQ
Q1. Arbaeen aur Ashura me kya farq hai?
Ans. Ashura (10 Muharram) wo din hai jab Hazrat Imam Hussain (RA) aur unke sathiyon ko Karbala ke maidan me shaheed kiya gaya tha. Jabki Arbaeen (20 Safar) unki shahadat ke theek 40 din baad ka din hai, jab unke parivar ke bache hue sadasya qaid se riha hokar wapas Karbala aaye the.
Q2. Arbaeen kis mahine me aur kab aata hai?
Ans. Arbaeen Islamic calendar ke doosre mahine Safar ki 20 tareekh ko aata hai. Yeh English calendar ke mutabik har saal lagbhag 10 se 11 din pehle sarakta hai.
Q3. Yazid kaun tha aur usne Imam Hussain ko kyun shaheed karwaya?
Ans. Yazid, Ameer Muawiyah ka beta tha jisne 61 Hijri me khud ko zabardasti musalmanon ka khalifa banaya tha. Wo bad-kirdar aur zalim tha. Wo chahta tha ki Imam Hussain (RA) uski hukoomat ko sahi tasleem karein. Jab Imam ne inkar kiya, toh Yazid ne unhe Karbala me shaheed karwa diya.
Q4. Kya Arbaeen me sirf Shia musalman hi jaate hain?
Ans. Nahi, Arbaeen me Shia musalmanon ke sath-sath Sunni musalman, Isai (Christians), Hindu aur duniya bhar ke insaniyat pasand log shamil hote hain kyunki Imam Hussain (RA) ki qurbani kisi ek firqe ke liye nahi balki poori insaniyat aur haq ke liye thi.
Que5. Chehlum kab hai aur yeh kyun manaya jata hai?
Ans. Chehlum (jise Arbaeen bhi kaha jata hai) har saal Islamic calendar ke mutabik 20 Safar ko manaya jata hai. Yeh din Hazrat Imam Hussain (RA) aur unke sathiyon ki shahadat ke theek 40 din baad aata hai, isliye ise urfi zaban me ‘Chehlum’ (yani chaliswan) kaha jata hai. Har saal iski tareekh English calendar ke hisab se badalti rehti hai.
