Islami tareekh mein Karbala ki kahani koi ek aam Waqiya nahi hai, balki yeh haq, sabr aur deen-e-Islam ko zinda rakhne ki ek aisi jinda misal hai jo qayamat tak ke liye amar (immortal) ho chuki hai. Her saal jab bhi Muharram ka chand nazar aata hai, to har insaan ka dil ghamo se bhar jata hai. Lekin kya aap jaante hain ki maidan-e-Karbala mein us aakhiri jung se pehle kya hua tha? Aakhirkaar Imam Hussain (R.A) ko Madina kyun chhodna pada aur aakhir Karbala tak baat kaise pahunchi thi ? Aaiye, ias article ke jariye hum Karbala ki kahani ke us hisse ko samajhte hain jo is poore waqia ka buniyadi background hai.
Karbala Ki Kahani Ka Shuruati Background
Deen e islam me Iss dard bhare Waqiye ki shuruat saal 60 Hijri mein hoti hai. Us waqt ke halaat ko samajhne ke liye sabse pehle hume yeh janna hoga ki Yazid kaun tha aur uska tareeqa-e-hukumat kya tha? Hazrat Muawiya (R.A) ke intiqal ke baad, unka beta Yazid Damishq (Damascus) ke takht par baith gaya. Yazid ke aate hi usne Islam mein chal rahi Khilafat ke nizaam ko badal kar badshahat me kar diya tha. Yani pehle ghar ka Khalifa tha, uske inteqal ke baad usi ghar fard gaddi per baithega.
Takht par baithte hi Yazid ne poore mulk se apni ‘Baiaat’ (wafaadari ka wada) maangna shuru kiya. Uska sabse zyada zor aur dabav baa is baat ko leker tha ki , kisi bhi tarah se bas Hazrat Imam Hussain (R.A) uski badshahat ko qubool kar lein, kyunki Yazid jaanta tha ki Nabi-e-Kareem ﷺ ke nawase ki haan ka matlab poori ummat ki haan hoti.
Hazrat Imam Hussain (R.A) Ka Baiaat Se Inkaar Aur Madina Chhodna
Karbala ki kahani ka sabse ahem mod Imam Hussain RA ka inkaar tha. Imam Hussain (R.A) bahut hi achhi tarah se jaante the ki Yazid ka kirdar aur uske faisle Islami usoolon ke khilaf ja rahe the. Agar unhone Yazid ke haath par baiaat kar li, to aane wali naslein badshahat ke zulm aur haraam kaamon ko hi asli Islam samajh baithti. Bas yahi kuch wajahat thi jiski wajah se Nabi Muhammad SAW ke nawase ne apne Nana ke deen ko bachane ke liye Yazid ki baiyt nahi ki.
Quran-e-Paak mein Allah Ta’ala farmata hai:
“Aur tum mein ek jamat aisi honi chahiye jo bhalai ki taraf bulaye aur acche kaamon ka hukm de aur bure kaamon se roke.” – (Surah Al-Imran, Ayat 104)
Isi hukm par chalte hue Imam Hussain (R.A) ne farmaya ki “Mujh jaisa ( jo Allah ki raza ke liye haq par ho), Yazid jaise (jo batil ho, aur Haqq, Sach ki inkaar karta ho) ki baiaat nahi kar sakta.” Jab halaat zyada kharab hone lage aur Imam Hussain per dabao badhne laga, to unhone apne khandaan ki salamati ke liye apna pyara watan Madina chhoda aur Makkah tashreef le aaye.
Kufa Ke Logon Ke Khat Aur Hazrat Muslim Bin Aqeel (R.A) Ka Safar
Imam Hussain (R.A) jab Makkah aa gaye the , tab Iraq ke shehar Kufa ke logon ko is baat ka pata chala. Kufa ke log Yazid ke zulm se bahut pareshan hone lage the. Phir Kufa ke logon ne Imam Hussain (R.A) ko hazaron ki taatad mein khat likhe, jisme likha tha: “Aap hamare Imam hain, aap Kufa aaiye, hum aapka sath denge aur aapke haath par baiaat karenge.”
Kufa ke logon ki sachayi janne ke liye Imam Hussain (R.A) ne apne chachazat bhai Hazrat Muslim bin Aqeel (R.A) ko Kufa bheja. Shuruat mein Kufa ke hazaron logon ne Hazrat Muslim ke haath par baiaat ki. Jab unhone kufa ka yeh acha manzar dekha to , Unhone Imam Hussain ko khat likh kar bhej diya ki halat bilkul theek hain, aap Kufa aa sakte hain.
Lekin iske chalte hi bich me Yazid ne Kufa ka governor badal diya aur wahan Ubaidullah ibn Ziyad naam ke ek berahm shakhs ko bhej diya. Ibn Ziyad ne aate hi Kufa ke logon ko draya, lalach diya aur unpar bahut hi sakhti ki. Natija yeh nikla ki jo log kal tak Hazrat Muslim ke sath khade the, unhone darr ke maare unka sath chhod diya. Phir kuch waqt ke baad Hazrat Muslim bin Aqeel (R.A) ko Kufa mein bohot berahmi se shaheed kar diya gaya, lekin unki shahadat ki khabar Imam Hussain tak der se pahunchi.
Makkah Se Karbala Ka Dardnaak Safar
Kufa se pehla sabaq milne se pehle hi Imam Hussain (R.A) Makkah se apna safar shuru kar chuke the. Unke sath unka poora parivar, chote bacche aur kuch wafadaar saathi the. Jab Aap Imam Hussain RA Safar me the usi dauran unhe pata chala ki Hazrat Muslim bin Aqeel (R.A) ko shaheed kar diya gaya hai aur Kufa ke log apni baat se palat chuke hain.
Iss mushkil ghadi mein bhi Imam Hussain ne apne sathiyon se farmaya ki jo laut kar jaana chahta hai woh laut jaye, kyunki Kufa ki aur sirf maut hai. Lekin unke sache saathi aur Ahle Bait unhe chhod kar nahi gaye. Rasoolullah ﷺ ne pehle hi farmaya tha:
“Hussain mujh se hai aur main Hussain se hoon, Allah us se mohabbat karta hai jo Hussain se mohabbat karta hai.” — (Sunan At-Tirmidhi, Hadees: 3775)
Isi deen e islam ki mohabbat mein yeh chhota sa qafila aage badhta raha, aur aakhir-kaar 2 Muharram 61 Hijri ko is qafile ka rukh ek aisi jagah par ruka jise duniya Karbala ke naam se jaanti hai.
Karbala Mein Aamad Aur Paani Ki Pabandi
Jaise hi Imam Hussain (R.A) ka qafila Karbala ki zameen par pahuncha, Wahi per Yazid ke ek commander Hur bin Yazid ne unka rasta rok liya. Imam Hussain ne wahan apna khema (camp) lagane ka faisla kiya. Kuch hi dinon mein Yazid ki ek bohot badi fauj (jiska neta Umar bin Sa’ad tha) wahan pahunch gayi.
Umar bin Sa’ad ne Yazid ke governor ke hukm par 7 Muharram ko Imam Hussain aur unke masoom bacchon par Furaat nadi ka paani band kar diya. Yeh wahi din tha jab Karbala ki tapte sehra (desert) mein 3 din tak Nabi ke khandaan ko bhooka aur pyaasa rakkha gaya. Yeh dastan ka woh mod hai jahan se Battle of Karbala Part 2 ki shuruat hoti hai, jise hum is series ke agle hisse mein gehrayi se samjhenge.
FAQs
Q1: Karbala ki kahani asal mein kya hai?
Ans: Karbala ki kahani Hazrat Imam Hussain (R.A) aur Yazid ke nizaam ke beech ka conflict hai. Yeh kahani hai deen-e-Islam ke usoolon ko bachane ke liye Nabi ﷺ ke khandaan dwara di gayi sabse badi qurbani ki.
Q2: Imam Hussain (R.A) Madina chhod kar Kufa kyun ja rahe the?
Ans: Kufa ke hazaron logon ne Imam Hussain ko khat likh kar bulaya tha ki woh Yazid ke zulm ke khilaf unka sath denge aur unhe apna Khalifa tasleem karenge. Isiliye deen ki hifazat ke liye unhone wahan ka rukh kiya.
Q3: Hazrat Muslim bin Aqeel kaun the aur unka Karbala se kya talluq hai?
Ans: Hazrat Muslim bin Aqeel (R.A), Imam Hussain ke chachazat bhai the. Unhe halat ka jaiza lene Kufa bheja gaya tha, jahan unhe dhoke se shaheed kar diya gaya. Unki shahadat Karbala ke waqia ka ek bohot bada aur dukhad hissa hai.
Q4: Imam Hussain (R.A) Kis tareekh ko Karbala pahunche the?
Ans: Hazrat Imam Hussain (R.A) apne khandaan aur sathiyon ke sath 2 Muharram 61 Hijri (2 October 680 AD) ko Karbala ke maidan mein pahunche the.
Q5: Karbala mein paani kab band kiya gaya tha?
Ans: Karbala mein Imam Hussain aur unke parivar par 7 Muharram ko paani band kiya gaya tha, jis ke baad 10 Muharram tak woh aur unke chote bacche pyaase rahe.
Conclusion: Part 1 Ka Sabaq
Karbala ki kahani ka yeh pehla hissa hum sabhi ko yeh sikhata hai ki, haq ke raste par chalne ke liye kitni badi qurbanian deni padti hain. Imam Hussain (R.A) jaante the ki rasta mushkil hai, par unhone usoolon par samjhauta nahi kiya.
